10. ágúst 2006: Þátturinn vísa vikunnar gefur göngu sína á ný eftir þriggja vikna sumarleyfi. Til þess að jafna vísureikninginn verða vísurnar þrjár að þessu sinni. Bjargey Arnórsdóttir, sem búsett er á Hofsstöðum í Reykhólahreppi hinum nýja, kom í sumar í Örlygshöfn við vestanverðan Patreksfjörð í fallegu veðri eins og þar er oft. Fjallið Hafnarmúli gnæfir yfir höfninni að innanverðu og þykir mörgum sem það sé með fegurstu fjöllum landsins. Framundan Örlygshöfninni er Tálkni, sem skilur að Patreksfjörð og Tálknafjörð og að utanverðu er Blakkurinn sem sjófarendur þekkja mætavel. Daginn eftir kom Bjargey í safnið að Hnjóti og skildi þessar vísur eftir: Hafnarmúlans hefðarfas hæfir kvöldsins friði horfir niður á gróið gras og gulan sand á iði. Töfrum skorinn Tálkninn rís tiginn báru ofar bjarmann gefa birtan kýs blíðu veðri lofar. Blakkur á við Ægir tafl öldur giska margar hvorugan þá þrýtur afl þrjóskan heiðri lofar.

<<<